Almaniyanın “Bayern” klubunun belçikalı baş məşqçisi Vensan Kompani səhhəti ilə əlaqədar təcili xəstəxanaya yerləşdirilib.
Arena.az xəbər verir ki, bu barədə “Bild” nəşri məlumat yayıb.
Mənbənin məlumatına görə, 40 yaşlı belçikalı mütəxəssis klubun məşq bazasında huşunu itirib və helikopterlə xəstəxanaya aparılıb. Bildirilir ki, Kompani son vaxtlar virus infeksiyasından əziyyət çəkib, lakin səhhətindəki problemlərə baxmayaraq, fəaliyyətini davam etdirib.
“Bayern” klubunun mətbuat xidməti baş məşqçinin hərtərəfli tibbi müayinədən keçəcəyini və həkimlərin nəzarəti altında qalacağını açıqlayıb. Mütəxəssisin vəziyyəti ilə bağlı əlavə təfərrüatlar hələlik açıqlanmayıb.
Münhen təmsilçisinin idman direktoru Maks Eberl Kompaninin sağlamlığının klub üçün əsas prioritet olduğunu vurğulayıb:
“Vensanın tezliklə sağalması üçün əlimizdən gələni edəcəyik. O, bütün lazımi tibbi yardımı və dəstəyi alacaq, həmçinin sağalması üçün ona lazım olan vaxt veriləcək. Yaxın müddətdə onun vəzifələrini məşqçilər korpusu icra edəcək. Biz onlara tam etibar edirik. “Bayern”dəki hər kəs Vensana tezliklə sağalmağı arzulayır”.
Qeyd edək ki, Vensan Kompani 2024-cü ilin mayından “Bayern”ə rəhbərlik edir. Onun başçılığı altında Münhen klubu iki dəfə Almaniya çempionu və Almaniya Super Kubokunun qalibi olub, həmçinin bir dəfə ölkə kubokunu qazanıb.
Cari mövsümdə “Bayern” Bundesliqanın 6 turundan sonra 14 xalla turnir cədvəlinə başçılıq edir. Komandanın UEFA Çempionlar Liqasının əsas mərhələsində isə 3 oyundan 5 xalı var. Münhen təmsilçisi bu mövsüm indiyədək heç bir məğlubiyyətlə üzləşməyib.
