Azərbaycan Premyer Liqasının 2026/2027 mövsümünün 9-cu turunun “Sumqayıt”la ev oyunu “Zirə”nin futbolçusu Quima üçün əlamətdar olub.
Arena.az bu barədə Peşəkar Futbol Liqasına istinadən xəbər verir.
Xəbərdə vurğulanır ki, bu gün Azərbaycan çempionatları tarixində yüksək liqada 15000-ci qol vurulub.
Yubiley topu Azərbaycan Premyer Liqasının 2026/2027-ci illər mövsümünün 9-cu turunun ikinci matçına təsadüf edib.
“Zirə” – “Sumqayıt” görüşündə vurulan ikinci qol tarixə 15000-ci kimi düşüb. Bu topu meydan sahiblərinin futbolçusu – “Quima” ləqəbi ilə tanınan Rikardo Martins rəqib qapısından keçirib.
Bu qarşılaşma turnirin tarixində ümumilikdə 6160-cı, baş tutan və texniki nəticə qeydə alınmayan 5881-ci oyun olub. 35 mövsümün ümumi orta məhsuldarlığı 2,55-ə bərabərdir.
Qeyd edək ki, ölkə çempionatları tarixində ilk qolu Mehman Alışanov vurub. O, 1992-ci il mayın 3-də keçirilən “Qarabağ” – “İnşaatçı” (Sabirabad) görüşündə (1:2) qonaqların qapısına yol tapıb.
