Azərbaycanlı FİFA referisi Əliyar Ağayev UEFA Millətlər Liqasının 2026/2027-ci illər mövsümünün qrup mərhələsinin oyununa təyinat alıb.
Arena.az bu barədə UEFA-nın rəsmi saytına istinadən xəbər verir.
Belə ki, Əliyar Ağayev noyabrın 16-da keçiriləcək Qazaxıstan – Slovakiya qarşılaşmasını idarə edəcək. 39 yaşlı referiyə bu görüşdə digər azərbaycanlı hakimlər – Zeynal Zeynalov və Akif Əmirəli yan xətdə kömək edəcəklər. İnqilab Məmmədov dördüncü hakim, Nicat İsmayıllı isə VAR hakiminin köməkçisi funksiyasını yerinə yetirəcək. VAR hakimi vəzifəsi avstriyalı Alan Kiyasa həvalə olunub.
Astana şəhərindəki “Astana Arena”da baş tutacaq bu oyuna Bakı vaxtı ilə saat 19:00-da start veriləcək. UEFA Millətlər Liqasının C Liqasının 3-cü qrupunda 6-cı tur çərçivəsində keçiriləcək bu matç ərəfəsində Slovakiya 5 oyundan 11 xalla turnir cədvəlinə başçılıq edir və artıq qrup qalibi olaraq B Liqasına yüksəlməyi təmin edib. Moldova 7 xalla ikinci, Farer adaları 5 xalla üçüncü, Qazaxıstan isə 2 xalla sonuncu pillədə qərarlaşıb.
Qazaxıstan üçün qarşılaşma xüsusi əhəmiyyət daşıyır. Komanda sonuncu pillədən yuxarı qalxmaq şansını qorumaq üçün Slovakiya ilə oyunda qələbə qazanmalıdır. Qazaxıstan Millətlər Liqasının bu mövsümündə hələ qələbə əldə etməyib: aktivində 2 heç-heçə və 3 məğlubiyyət var. Slovakiya isə 3 qələbə və 2 heç-heçə ilə məğlubiyyətsiz irəliləyir.
