Portuqaliya millisinin kapitanı Kristiano Ronaldo DÇ-2026-nın 1/16 finalında Xorvatiyaya qarşı keçirilən oyunda bir neçə tarixi rekorda imza atıb.
Arena.az xəbər verir ki, 41 yaş 147 günlük olan ulduz futbolçu mundialların pley-off mərhələsində meydana çıxan ən yaşlı futbolçu kimi tarixə düşüb.
O, bu göstəricidə 1990-cı il dünya çempionatında 40 yaş 292 günlüyündə İngiltərə millisinin heyətində çıxış edən qapıçı Piter Şiltonun rekordunu geridə qoyub.
Ronaldo eyni zamanda dünya çempionatları tarixində keçirdiyi oyunların sayını 26-ya çatdıraraq bu göstəricidə Almaniya millisinin sabiq kapitanı Lotar Matteusu (25 oyun) geridə qoyub və ikinci pilləyə yüksəlib. Rekord isə 29 oyunla Argentina millisinin kapitanı Lionel Messiyə məxsusdur.
Təcrübəli hücumçu Xorvatiya ilə qarşılaşmada vurduğu penalti qolu ilə daha bir uğursuz seriyanı da sona çatdırıb. Bu, Ronaldonun dünya çempionatlarının pley-off mərhələsində vurduğu ilk qol olub. O, buna qədər mundialların pley-offunda keçirdiyi 8 oyunda nə qol vurmuş, nə də məhsuldar ötürmə etmişdi.
Beləliklə, Portuqaliya millisinin lideri bir oyunda həm mundial pley-offunun ən yaşlı iştirakçısı olub, həm dünya çempionatlarında ən çox oyun keçirən futbolçular siyahısında ikinci pilləyə yüksəlib, həm də karyerasında ilk dəfə dünya çempionatının pley-off mərhələsində fərqlənməyi bacarıb.
Kristiano Ronaldo matçdan sonra Xorvatiya ilə oyunun ən yaxşı futbolçusu da seçilib.
Qeyd edək ki, dünya çempionatı ABŞ, Kanada və Meksikada keçirilir. Turnir iyulun 19-da başa çatacaq. Portuqaliya millisi növbəti mərhələdə İspaniya yığması ilə üz-üzə gələcək.
