“Qarabağ”ın rusiyalı qapıçısı Andrey Lunyovun agenti Anton Smirnov klubumuzun Avropa Liqasının 1/8 finalına adlamasına münasibət bildirib.
Arena.az xatırladır ki, “Qarabağ” dünən Portuqaliya təmsilçisi “Braqa”ya evdə 2:3 hesabı ilə məğlub olsa da, ilk oyunda səfərdə qazandığı 4:2 hesablı qələbə sayəsində yarışın növbəti mərhələsinə adlayıb.
“Qarabağ” ümumilikdə 70 dəqiqə azlıqda oynayıb. Əlaçılar, əlavə vaxtda tab gətirdilər və qol vurdular. Hesab unudulur, amma Avropa Liqasının 1/8 finalına yüksəlmək – bu, tarixdir!
Kluba görə məğruram, Andrey ilə fəxr edirəm. Bir daha təsdiqləndi ki, biz düzgün seçim etmişik. Lunyov hara gedir, bu necə çempionatdır, necə komandadır deyənlərin bütün hamısına isə cavab vermək istərdim – ağızlarınızı bağlayın və tabloya baxın. Baxın, Lunyovun “Qarabağ”la harada oynadığına baxın”, – “RB Sport” dərgisi Smirnovdan sitat gətirir.
Smirnovun açıqladığı digər məlumata görə, “Qarabağ” Lunyova yeni müqavilə təklif edib. O qeyd edib ki, Ağdam təmsilçisi rus futbolçu ilə əməkdaşlığı davam etdirmək fikrindədir:
“Müqavilənin müddətinin artırılması ilə bağlı “Qarabağ”dan təklif gəlib. Hazırda şərtlərin müzakirəsi gedir”.
Yeri gəlmişkən, UEFA da Lunyovun Avropa Liqasında çıxışını yüksək səviyyədə qiymətləndirib. Qurumun rəsmi saytında UEFA-nın mətbuat xidməti tərəfindən azarkeşləri “Qarabağ” Futbol Klubu ilə tanış edən məqalədə rusiyalı qapıçının çıxışı barədə bunlar qeyd olunub:
“Fərqli mövqelərdən danışsaq, yayda komandanı gücləndirmiş yeni oyunçu Lunyov fərqlənir. Daha əvvəl “Bayer”də çıxış etmiş rusiyalı qapıçı etibarlıdır”, – UEFA-nın məqaləsində deyilir.
Xatırladaq ki, 2023-cü ilin yayında “Qarabağ”a keçən Andrey Lunyovun Ağdam klubu ilə müqaviləsinin müddəti bu ilin iyununda başa çatır. 32 yaşlı qolkiper cari mövsümdə Azərbaycan çempionunun heyətində 22 oyuna çıxıb, 29 qol buraxıb, 7 qarşılaşmada qapısının toxunulmazlığını təmin edə bilib.
Lunyov daha öncə “Zenit”, “Kaluqa”, “Ufa”, “Torpedo” (Moskva), “İstra”, “Saturn” və “Bayer”də də forma geyinib. O, Rusiya milli komandasında da 7 oyuna çıxıb.
