Premyer Liqada mübarizə aparan “Sabah” komandası Azərbaycan çempionatlarında 40-cı səfər qələbəsini qazanıb.
Arena.az xəbər verir ki, bu barədə Peşəkar Futbol Liqasının (PFL) mətbuat xidməti məlumat yayıb.
Bakı klubu Azərbaycan Premyer Liqasının 17-ci turu çərçivəsində səfərdə qarşılaşdığı “Araz-Naxçıvan”ı 1:0 hesabı ilə məğlub edib.
Paytaxt təmsilçisi bu yubileyə rəqib meydanlarındakı 97-ci görüşdə nail olub. “Sabah” səfərdə ən azı 40 dəfə qalib gələn 13-cü komandadır.
Xatırladaq ki, “Sabah” ilk uğurunu Premyer Liqadakı debüt matçında əldə edib. 2018-ci il avqustun 12-də “Şamaxı” ilə səfər oyununda 1:0 hesablı qələbə qeydə alınıb.
