Azərbaycan millisinin müdafiəçisi Anton Krivotsyuk “Daejeon Hana Sitizen”in komandasının heyətində növbəti oyununa çıxıb.
Arena.az xəbər verir ki, futbolçumuzun komandası Cənubi Koreya çempionatının (K Liqa 1) 2025-ci il mövsümünün final mərhələsindəki dördüncü oyununda “Qanqvon”la qarşılaşıb.
“Daejeon Hana Sitizen” bu rəqiblə doğma meydanda üz-üzə gəlib. Krivotsyukun komandası yekunda heç-heçə ilə kifayətlənib – 1:1.
Anton bu görüşün 89-cu dəqiqəsində meydana buraxılıb.
“Daejeon Hana Sitizen” cari mövsümdə keçirdiyi 37 oyuna topladığı 62 xalla 12 iştirakçı arasında ikinci yerdə qərarlaşıb. Krivotsyukun komandası 35 oyuna 17 qələbə qazanıb, 11 heç-heçə edib, 9 məğlubiyyətə üzülüb. Anton bu görüşlərin 29-da iştirak edib, 2 qola imza atıb.
Xatırladaq ki, Anton Krivotsyuk Cənubi Koreya klubuna 2023-cü ilin fevral ayında Polşanın “Visla” (Plotsk) komandasından 600 min avro qarşılığında transfer olunub. O, bu komandanın heyətində 91 oyuna çıxıb, 5 qol, 3 məhsuldar ötürmə müəllifi olub. 26 yaşlı müdafiəçinin Cənubi Koreya klubu ilə 2027-ci il dekabrın 31-nə qədər nəzərdə tutulmuş müqaviləsi mövcuddur.
Anton daha öncə Azərbaycanda “Neftçi”nin uğurları üçün çalışıb. Mərkəz müdafiəçisi Azərbaycan yığma komandasında da 45 matça çıxıb, 1 qola imza atıb.
