İngiltərənin “Mançester Yunayted” komandasının yeni baş məşqçisi Maurisio Poçettino qarşılarında duran əsas vəzifələrdən danışıb.
Arena.az xəbər verir ki, 54 yaşlı argentinalı mütəxəssis klubun rəsmi saytına açıqlamasında düzgün daxili mühitin yaradılmasını və futbolçuların inkişafı üçün lazımi şəraitin formalaşdırılmasını əsas prioritet kimi göstərib:
“Mədəniyyət yaratmaq ən vacib məsələdir. Vərdişlər və prinsiplər formalaşdırmalıyıq – məhz buna çalışırıq. Qarşıya baxmalı və elə vərdişlər, elə bir mədəniyyət formalaşdırmalıyıq ki, hər oyunda qələbəyə yaxınlaşaq”.
Argentinalı baş məşqçi hazırkı heyətə tam etimad göstərdiyini də vurğulayıb:
“Əlimizdə ola biləcək ən yaxşı heyət hazırda sahib olduğumuz futbolçulardır və biz onları dəyərləndirməliyik. Futbolçularımızı dəstəkləməliyik. Bizim vəzifəmiz onlara effektiv oyun nümayiş etdirmək üçün bütün lazımi imkanları yaratmaqdır. İndi məsuliyyətlə işləməyə başlamalı və futbolçuların istedadlarını meydanda tam şəkildə göstərməsinə imkan verəcək şərait formalaşdırmalıyıq”.
Qeyd edək ki, Poçettino noyabrın 13-də “Mançester Yunayted”in baş məşqçisi təyin olunub. O, ABŞ millisindən ayrıldıqdan sonra İngiltərə klubunun sükanı arxasına keçib.
Argentinalı mütəxəssis “Mançester Yunayted”də Maykl Karriki əvəzləyib. Karrik mövsümün uğursuz startından sonra vəzifəsindən göndərilib.
“Qırmızı şeytanlar” İngiltərə Premyer Liqasının 2026/27 mövsümündə ilk 10 turdan sonra cəmi 8 xal toplayıb və turnir cədvəlinin 18-ci pilləsində, yəni aşağı liqaya düşmə zonasında qərarlaşıb.
Poçettinonun rəhbərliyi altında ilk oyun noyabrın 22-də keçiriləcək. “Mançester Yunayted” həmin gün səfərdə “Liverpul”la qarşılaşacaq.


