Azərbaycanın U-21 millisinin baş məşqçisi Samir Əliyev bu gün Qırğızıstanın U-23 yığmasına qarşı keçirdikləri yoxlama oyununu şərh edib.
Arena.az xəbər verir ki, 21 yaşadək futbolçulardan ibarət millimiz bu gün Bakıda Qırğızıstanın 23 yaşlıları ilə qarşılaşıb.
Oyun 1:1 hesabıyla başa çatıb. Üç gün öncə Türkiyənin U-21 yığması ilə də İstanbulda qarşılaşmış və 0:1 hesabıyla uduzmuş millimizin baş məşqçisi Samir Əliyev AFFA-nın rəsmi saytına açıqlamasında bunları söyləyib:
“Məşqçilər korpusu olaraq, futbolçuların yanaşmasından, oyuna hazırlığından, mübarizə aparmaqlarından tam razıyıq. Bildiyiniz kimi, iyunun 17-də İstanbulda Türkiyə yığması ilə qarşılaşmışdıq. Çalışırdıq ki, qısa zamanda futbolçuları bərpa edək, oyuna hazırlayaq. Bəzi futbolçularda yorğunluq hiss olunurdu. Buna baxmayaraq, çox yaxşı mübarizə apardıq, bir neçə qol vəziyyəti yaratdıq. Ustalıq səviyyəsi çatmadı ki, yaratdığımız imkanları qola çevirək. Təəssüf ki, elementar səhvdən qapımıza penalti təyin olundu.
Həm Türkiyə ilə, həm də bu oyunda yeni sistem uzərində işlədik, bir çox oyunçuya şans verdik. Hər iki oyun göstərdi ki, ümid yeri var. Təbii ki, inkişaf etmək üçün daha çox çalışmalıyıq. Məşqçilər korpusu olaraq, qarşıdakı günlərdə soyuq başla hər iki oyunu təhlil edəcəyik. Məqsəd sentyabrdakı rəsmi oyunlara daha yaxşı hazırlaşmaqdır”.
