Futbol üzrə Azərbaycan millisinin hücumçusu Mahir Emreli Xorvatiyanın “Dinamo” (Zaqreb) komandasında növbəti matçına çıxıb.
Arena.az xəbər verir ki, futbolçumuzun komandası bu gün Xorvatiya çempionatının 2-ci turu çərçivəsində “İstra 1961” klubu ilə qarşılaşıb.
Səfərdə baş tutan bu oyun Zaqreb təmsilçisi üçün uğurlu alınıb. Mahir də matça start heyətdə başlayıb. Hesabı 6-cı dəqiqədə Luka İvanuşeç açıb ki, ona məhsuldar ötürməni azərbaycanlı hücumçu verib. 57-ci dəqiqədə isə İvanuşeçin ötürməsindən sonra Mahir rəqib qapısına yol tapıb. Qarşılaşmada son nöqtəni 69-cu dəqiqədə fərqlənən Robert Lyubiçiç qoyub – 3:0.
Bu oyunda 1 qol və 1 məhsuldar ötürmə müəllifi olan Emreli 88-ci dəqiqədə əvəzlənib.
Son Xorvatiya çempionu olan “Dinamo” 2 turdan sonra 3 xalla 10 iştirakçı arasında 4-cü pillədə qərarlaşıb.
Xatırladaq ki, Mahir Emreli “Dinamo”ya 2022-ci ilin fevral ayında Polşanın “Legiya” (Varşava) klubundan transfer olunub. O, bu komandanın heyətində bütövlükdə 25 matça çıxıb və 6 qol vurub.
