Futbol üzrə Azərbaycan millisinin hücumçusu Mahir Emrelinin formasını geyindiyi Zaqreb “Dinamo”su növbəti matçına çıxıb.
Arena.az xəbər verir ki, futbolçumuzun komandası bu gün Avropa Konfrans Liqasının qrup mərhələsinin 5-ci turu çərçivəsində Qazaxısttan təmsilçisi “Astana” ilə qarşılaşıb.
Səfərdə baş tutan bu oyun Xorvatiya təmsilçisinin qələbəsi ilə başa çatıb – 2:0. “Dinamo” hər iki qolu ikinci hissədə meydan sahiblərinin qapısından keçirib.
Azərbaycanlı futbolçu bu matçın iştirakçısı olmayıb. O, sonadək ehtiyatda qalıb.
“Dinamo” 5 turdan sonra 6 xalla C qrupunun ikincisidir. “Viktoriya” (Plzen) 12 xalla 1-cidir. “Astana” və “Ballkani”nin də 4 xalı var. Amma qrupun digər matçının nəticəsindən asılı olaraq, “Dinamo” turu üçüncü pillədə də başa vura bilər.
Xatırladaq ki, Mahir Emreli “Dinamo”ya 2022-ci ilin fevral ayında Polşanın “Legiya” (Varşava) klubundan transfer olunub. O, bu komandanın heyətində bütövlükdə 44 matça çıxıb, 10 qol vurub, 5 məhsuldar ötürmə müəllifi olub. Karyerası ərzində “Qarabağ”, “Legiya”, “Konyaspor” və “Bakı”da da oynamış hücumçu Azərbaycan millisində keçirdiyi 46 oyunda 5 qol vurub.
