Futbol üzrə Yunanıstanın yığmasının və “Panatinaikos”un yarımmüdafiəçisi Dimitrios Kurbelis “Trabzonspor”a transfer olunub.
Arena.az xəbər verir ki, bu barədə Super Liqa təmsilçisinin mətbuat xidməti məlumat yayıb.
Bu, trabzonluların 2023/2024 mövsümü öncəsi ilk transferidir.
29 yaşlı futbolçu Türkiyə klubu ilə 2+1 illik müqaviləyə imza atıb. Trabzon təmsilçisi yeni transferinin müqavilə şərtlərini də açıqlayıb. Belə ki, yunan dayaq yarımmüdafiəçisinin ilk mövsümündə 950 min avro qazanacağı diqqətə çatdırılıb. Onun 2024/2025 mövsümü üçün qazancı 1 milyon avro təşkil edəcək. Müqavilənin əlavə bir ili aktivləşdirilsə, o zaman Kurbelis 2025/2026 mövsümündə 1,1 milyon gəlir əldə edəcək.
Kurbelis təqdimat videosunda klubun azarkeşlərinə səslənib: “Salam, “Trabzonspor” tərəfdarları. Ailənizə qatıldığım üçün çox xoşbəxtəm. Əlimdən gələnin ən yaxşısını etmək üçün hazıram. Bizə hər yer Trabzon”.
Dimitrios Kurbelis “Asteras” (Tripolis) klubunun yetirməsidir. O, sözügedən komandada 131 oyun keçirib, 3 qol və 1 assistlə yadda qalıb. 2017-ci ilin yanvarından isə futbolçu “Panatinaikos”da forma geyinirdi. Bu komandada 174 oyuna 8 qol və 10 assist müəllifi olmuş futbolçu Afina təmsilçisindən azad agent kimi ayrılıb. Onun bu klubla müqaviləsi bu ayın sonuna kimi idi.
Kurbelis Yunanıstan milli komandasında da 32 oyun keçirib, 1 qol vurub.
