Futbol üzrə Azərbaycan millisinin üzvü, bu yay “Neftçi”dən azad agent kimi ayrılmış Höccət Haqverdi yenidən “Sumqayıt”a qayıdıb.
Arena.az bu barədə “Sumqayıt”ın mətbuat xidmətinə istinadən xəbər verir.
Bildirilir ki, 2025/2026-cı illər mövsümü üçün transfer çalışmalarını davam etdirən “Sumqayıt” daha bir futbolçunun keçidini reallaşdırıb. Klub ötən mövsümü “Neftçi”də keçirmiş Höccət Haqverdi ilə 2 illik müqavilə bağlayıb. Təcrübəli müdafiəçi köhnə-yeni komandasında 3 nömrəli formada çıxış edəcək.
Xatırladaq ki, Höccət 2023-cü ilin yanvarında məhz “Sumqayıt”dan ayrılaraq “Neftçi”yə keçmişdi. O, paytaxt klubunun heyətində 77 oyuna çıxıb, 1 məhsuldar ötürmə müəllifi olub.
Onun “Sumqayıt” karyerası isə 49 oyun, 1 qol və 1 assistdən ibarətdir. 2020/2021-ci illər mövsümündə “Sumqayıt”la bürünc medal qazanmış Haqverdi, 1,5 mövsüm bu komandanın şərəfini qoruyub.
Höccət daha öncə “Paykan”, “Zobahan”, “Traktor” və “Abumoslem” kimi klubların da formasını geyinib.
Haqverdi 2021-ci ilin iyun ayında debüt etdiyi Azərbaycan millisinin heyətində 23 oyuna çıxıb. O, bu oyunlarda 1 qol vurub.
