İsveçrənin “Sürix” klubundan azad agent kimi ayrılmış yarımmüdafiəçi İfeanyi Metyu bundan sonra “Neftçi”nin uğurları üçün çalışacaq.
Arena.az bu barədə paytaxt klubunun mətbuat xidməti məlumat yayıb.
Belə ki, “ağ-qaralar” bu gün növbəti transferini rəsmiləşdirib. Nigeriyalı futbolçu Metyu artıq “Neftçi” ailəsinin üzvüdür. 28 yaşlı yarımmüdafiəçi ilə 1+1 illik müqavilə bağlanıb. O, yeni komandasında 18 nömrəli formanı geyinəcək.
Sonuncu klubu “Sürix” olan Metyu vətənindən başqa, Norveç və Türkiyə liqalarında da oynayıb. O, “El-Kanemi Uorriors”, “Kano Pillars”, “Lilleström”, “Osmanlıspor” klublarının şərəfini qoruyub.
İfeanyi Metyu Norveç kubokunun və 20 yaşadək futbolçular arasında Afrika Kubokunun qalibi olub.
Metyu Nigeriyanın U-20 yığmasının formasını geyinsə də, sonradan əsas milli komandada debüt şansı qazanmayıb.
