Müqavilə ilə “Sabah”a məxsus olan yarımmüdafiəçisi İldar Ələkbərov icarə əsasında bu mövsümün sonuna kimi “Araz-Naxçıvan”da çıxış edəcək.
Arena.az xəbər verir ki, dünən “Zirə” ilə keçirilən yoxlama matçında da meydana çıxan futbolçu Naxçıvan klubunun rəsmi saytına açıqlama verib.
O, ilkin təəssüratlarını bölüşüb: “İlk növbədə məni inanaraq komandaya dəvət etdiyinə görə məşqçilər heyətinə təşəkkür edirəm. Bu mövsüm “Sabah”ın heyətində demək olar oynamırdım, nadir hallarda meydana çıxırdım. Müqavilə ilə məxsus olduğum klub təcrübə qazanmağım üçün icarə əsasında da olsa, özümü oynaya biləcəyim bir komandada sınamaq şansı yaratdı. Artıq bir neçə gündür “Araz-Naxçıvan”ın düşərgəsindəyəm. Təbii ki, yeni komanda və heyət üzvlərinin arasına düşmüşəm və uyğunlaşmaq üçün az da olsa, zaman lazımdır. Uşaqlar yaxşı qarşıladılar, aralarında tanıdıqlarım da var. Atmosfer yaxşıdır, baxıram, hamı oynamaq istəyir, bunun üçün çalışır.
“Zirə” ilə yoxlama görüşündə fasilədən sonra oyuna qoşuldum. Hələ tam hazır deyiləm. Xüsusilə də fiziki planda axsamalar var. Oyundan sonra baş məşqçi ilə də söhbətimiz oldu, fikirlərini dinlədim. Əlbəttə, onun dedikləri çox önəmlidir. Elə etməliyəm ki, çempionatın bərpasına qədər çatışmazlıqları aradan qaldırım”.
Xatırladaq ki, İldar Ələkbərov 2021-ci ilin avqust ayında “Nefteximik”dən “Sabah”a gəlib. O, paytaxt təmsilçisinin əsas komandasında 34 oyun keçirib, 6 məhsuldar ötürmə müəllifi olub. 22 yaşlı futbolçu əvvəllər Rusiyada “Nefteximik” və “Stroqinyo”da oynayıb. O, Azərbaycanın U-21 millisinin də formasını geyinib.
