“Zirə”in yarımmüdafiəçisi İlkin Muradov Azərbaycan Kubokunun 1/4 final mərhələsində “Səbail”ə qarşı keçirdikləri cavab oyununu şərh edib.
Arena.az-a müsahibə verən 27 yaşlı futbolçu komandasının 3:0 hesablı qələbəsi (ilk oyun 2:1) ilə bağlı danışıb:
- Oyun haqda təəssüratlarınız necədir?
- Çox ciddi hazırlaşmışdıq. Bilirdik ki, “Səbail” çox ciddi komandadır. Qalib gəlib növbəti mərhələyə yüksəldiyimiz üçün çox sevincliyəm.
- Ölkə kubokunun qalibi olmaq yolunda şanslarınızı necə dəyərləndirirsiniz?
- Bu turnir bizim üçün vacibdir. Hədəfimiz ölkə kubokunun finalına qədər yüksəlməkdir.
- “Araz-Naxçıvan” – “Qəbələ” cütündən hansı komanda ilə qarşılaşmaq istəyərdiniz?
- İkisi də çox təhlükəli komandadır. Hansı ilə düşməyimizdən asılı olmayaraq, ciddi hazırlaşacağıq.
- “Zirə”ni “Sumqayıt” və “Neftçi” ilə ölkə çempionatında çətin oyunlar gözləyir. Bu barədə nə deyə bilərsiniz?
- Hər iki oyun bizim üçün vacibdir. Ümid edirəm ki, hər iki görüşə ciddi hazırlaşıb, yüksək pillələr uğrunda mübarizə aparacağıq.
Xatırladaq ki, İlkin Muradov “Səbail”ə 3:0 hesabıyla qalib gəldikləri cavab matçının 70-ci dəqiqəsində meydana buraxılıb.
Nahid Məmmədov
