Futzal üzrə Azərbaycan çempionu “Araz”ın (Naxçıvan) baş məşqçisi Joze Alesio da Silva UEFA Çempionlar Liqasının əsas mərhələsi çərçivəsində bu gün “Yunayted Qalati”yə (Rumıniya) qarşı keçirdikləri oyunu şərh edib.
Arena.az xəbər verir ki, braziliyalı mütəxəssis 5:3 hesabıyla qalib gəldikləri matçdan sonra baş tutan mətbuat konfransında bunları söyləyib:
“Çox çətin oyun oldu. Qələbə qazansaq da, komandamın oyunundan razı qalmadım. Ola bilsin, “Uraqan”a qarşı çox güc sərf etdik, onun yorğunluğundan irəli gəlsin.
Başlanğıc yaxşı oldu. Ardıcıl iki qol vurduq. Bunun davamını da gətirə bilərdik. Şanslarımız oldu. Sonra ötürmələrdə çoxlu səhvlərə yol verdik. Uşaqlar istəkli idilər, qələbə qazanmaq üçün çalışdılar. Ancaq səhvlərdən də qaça bilmədik. Həm də bu gün Rumıniya təmsilçisinin iki futzalçısı bizə qarşı oynamadı. Biri zədəli, digəri cəzalı idi. Uşaqlar bunu bilirdilər. Bu da görünür onlarda arxayınlıq yaratdı, konsentrasiyanı itirdi.
Çox işləməliyik. Belə oynamamalıyıq. Nizam-intizam çox vacibdir. Udmaq da olar, uduzmaq da. Amma düzgün oynamaq, intizama riayət etmək lazımdir. Yenə deyirim, düzəltməli olduğumuz məqamlar var”.
Joze Alesio yer aldıqları 6-cı qrupdakı vəziyyətlə bağlı çox danışmaq istəməyib: “Qrupdakı vəziyyətlə bağlı indi bir söz deyə bilmərəm. Günün ikinci oyununu nəticəsindən çox şey asılıdır. Ona görə də son matça belə qələbə qazanmaq üçün çıxacağıq”.
Xatırladaq ki, “Araz” qrupdakı ilk oyununda Ukraynanın “Uraqan” komandasına 1:2 hesabıyla uduzub. Komandamız son turda Kosovonun “Ligeni” kollektivi ilə üz-üzə gələcək. Hansı ki, bu komanda bu gün “Uraqan”la qarşılaşacaq. Hazırda “Araz”, “Uraqan” və “Ligeni” 3 xala malikdir, “Yunayted Qalati” isə 0 xalla sonsuzdur.
