Madrid “Atletiko”sunun prezidenti Enrike Sereso “Mançester Siti”nin hücumçusu Xulian Alvaresin mümkün transferindən danışıb.
Arena.az Seresonun bu barədə fikrini təqdim edir:
“Xulian Alvares? Hələlik hər şey yalnız layihələrlə məhdudlaşır. Texniki heyət işləyir. Xüsusi bir məqam görünərsə, biləcəksiniz. Əmin ola bilərsiniz ki, biz böyük oyunçularla müqavilə imzalamaq üzərində işləyirik, güclü komanda qurmaq istəyindəyik”, deyə Sereso vurğulayıb.
Xatırladaq ki, Xulian Alvares “Mançester Siti”yə 2022-ci ilin yanvarında Argentinanın “River Pleyt” klubundan 21,4 milyon avro qarşılığında gəlib. 24 yaşlı forvard Premyer Liqa nəhənginin heyətində indiyə qədər 103 oyuna çıxıb. O, bu oyunlarda 36 qol vurub, 18 məhsuldar ötürmə müəllifi olub.
Alvares daha öncə yalnız yetirməsi olduğu “River Pleyt”də oynayıb – 122 oyun, 54 qol və 31 assist.
Argentinalı hücumçu 2021-ci ilin iyun ayında debüt etdiyi ölkəsinin əsas millisində 36 oyuna çıxıb. Bu oyunlarda 9 qol və 1 assist müəllifi olmuş Alvares daha öncə Argentinanın U-20 və U-23 yığmalarında da forma geyinib.
“Transfermarkt” internet-portalı 24 yaşlı forvardın transfer dəyərini 90 milyon avro məbləğində qiymətləndirir.
