Futbol üzrə Azərbaycan millisinin hücumçusu Mahir Emreli Xorvatiyanın “Dinamo” (Zaqreb) komandasında növbəti matçına çıxıb.
Arena.az xəbər verir ki, futbolçumuzun komandası bu gün UEFA Çempionlar Liqasının 2023/2024 mövsümündə növbəti matçını keçirib.
Qitənin ən nüfuzlu klub turnirinə birbaşa 2-ci təsnifat mərhələsindən başlayan zaqreblilər Qazaxıstanın “Astana” kollektivi ilə cavab matçında üz-üzə gəliblər.
Zaqrebdə baş tutan oyun meydan sahiblərinin 4:0 hesablı qələbəsi ilə başa çatmışdı. Səfərdəki oyun da Xorvatiya nəhənginin 2:0 hesablı qələbəsiylə yekunlaşıb.
Mahir bu oyunda meydana start heyətdə daxil olub. O, 24-cü dəqiqədə fərqlənməklə komandasının ilk qolunu vurub. Emreli 78-ci dəqiqədə Yosip Drmiçlə əvəzlənib.
“Dinamo” UEFA Çempionlar Liqasının 3-cü təsnifat mərhələsində Yunanıstanın AEK komandası ilə üz-üzə gələcək. Futbolçumuzun komandası bu rəqibə qarşı ilk oyununu avqustun 8-də səfərdə, cavab görüşünü isə ayın 15-də evdə keçirəcək.
Xatırladaq ki, Mahir Emreli “Dinamo”ya 2022-ci ilin fevral ayında Polşanın “Legiya” (Varşava) klubundan transfer olunub. O, bu komandanın heyətində bütövlükdə 26 matça çıxıb və 7 qol vurub.
