Premyer Liqa “Mançester Siti”nin maliyyə qaydalarını ciddi şəkildə pozması ilə bağlı ittihamların müstəqil komissiya tərəfindən təsdiqləndiyini açıqlayıb.
Arena.az xəbər verir ki, bu barədə İngiltərə Premyer Liqasının rəsmi saytı məlumat yayıb.
Müstəqil komissiyanın araşdırmasına əsasən, “Mançester Siti” 2009–2018-ci illər ərzində bir sıra kommersiya tərəfdaşları ilə saxta müqavilələr bağlayıb. Bildirilir ki, klub bu və digər sazişlər vasitəsilə gəlirlərini süni şəkildə artırıb və xərclərini aşağı göstərib.
Komissiya həmçinin klubun maliyyə hesabatlarında təhrif olunmuş məlumatlar təqdim etdiyini və auditorlardan, eləcə də futbol tənzimləyicilərindən maliyyə vəziyyətinin real durumunu gizlətdiyini müəyyənləşdirib.
Qərara əsasən, “Mançester Siti” həm Premyer Liqanın, həm də UEFA-nın maliyyə xərcləri ilə bağlı müəyyən etdiyi limitləri əhəmiyyətli dərəcədə pozub. Klub, həmçinin Premyer Liqanın araşdırması zamanı liqa ilə əməkdaşlıq və dürüstlük öhdəliklərini dəfələrlə pozmaqda ittiham olunub.
Qeyd edək ki, “Mançester Siti”nin komissiyanın nəticələrindən oktyabrın 2-dək apellyasiya şikayəti vermək hüququ var.
Kluba tətbiq ediləcək mümkün sanksiyalar isə ayrıca iclasda, müstəqil komissiyanın növbəti dinləməsində müəyyənləşdiriləcək. Premyer Liqa qaydalarına əsasən, belə işlər üzrə cərimə, xal silinməsi və digər idman sanksiyaları nəzərdə tutula bilər.
