Futbol üzrə Azərbaycan millisinin hücumçusu Ramil Şeydayev Tailandın “Buriram Yunayted” komandasında növbəti matçına çıxıb.
Arena.az xəbər verir ki, o, Asiya Çempionlar Liqasının 2023/2024 mövsümünün qrup mərhələsinin 1-ci turu çərçivəsində baş tutan Çinin “Qrintaun” komandası ilə matçın iştirakçısı olub.
“Buriram Yunayted” bu rəqiblə doğma meydanda qarşılaşıb və 4:1 hesablı qələbəyə sevinib.
Matça start heyətində başlayan 27 yaşlı azərbaycanlı hücumçu 73-cü dəqiqədə əvəzlənib. Ramil bu oyunda məhsuldar fəaliyyəti ilə yadda qala bilməyib.
Bu nəticədən sonra 3 xala malik “Buriram Yunayted” yer aldığı H qrupunda liderdir.
Xatırladaq ki, “Buriram Yunayted” ötən mövsüm Tailandda həm çempionatın, həm də ölkə kubokunun qalibi olub.
Bu yay “Qarabağ”dan ayrılan Ramil Şeydayev “Buriram Yunayted”lə azad agent kimi 2 illik müqaviləyə imza atıb. O, bu komandada indiyə qədər 6 oyuna çıxıb, 2 məhsuldar ötürmə müəllifi olub.
