“Mançester Yunayted”in sabiq yarımmüdafiəçisi Roy Kin “Mançester Siti”nin maliyyə qaydalarını pozmaqda təqsirli bilinməsinə münasibət bildirib.
Arena.az xəbər verir ki, daha əvvəl “Mançester Siti”nin irəli sürülən 115 ittiham epizodundan 114-ü üzrə təqsirli bilindiyi barədə məlumat yayılıb.
Roy Kin Britaniya mətbuatına açıqlamasında klubun İngiltərə Premyer Liqasının maliyyə qaydalarını pozmaqda təqsirli bilinməsini belə şərh edib:
“Bunun çoxdan baş verməli olduğunu düşünürəm. Tamamilə aydındır ki, bütün bu məsələ artıq neçə ildir davam edir. Klub bu seçimi özü etdi – onlar bilərəkdən aldatmağa getdilər. Son illərdə qazandıqları hər şeyə necə nail olmalarından asılı olmayaraq, bunu ədalətsiz yolla əldə ediblər və indi cəzalandırılmalıdırlar”.
Xatırladaq ki, “Mançester Siti” 2009/10-2017/18 mövsümləri arasında yol verdiyi iddia olunan 100-dən çox maliyyə pozuntusuna görə 2024-cü ilin fevralında ittiham olunub.
Klubun üzləşə biləcəyi mümkün sanksiyalar arasında xal silinməsi, Premyer Liqadan xaric edilmə və qazanılmış titulların ləğvi kimi cəzalar da göstərilir. Bununla belə, konkret sanksiyalar hələ təsdiqlənməyib.
