“Neftçi”nin yeni transferi Solomon Kvirkveliya klubun mətbuat xidmətinə müsahibə verib. Arena.az xəbər verir ki, Gürcüstan yığmasının da üzvü olan mərkəz müdafiəçisi bunları söyləyib:
“Neftçi” çox yaxşı tarixi olan klubdur. Bu klub haqqında çox şey bilirəm və eşitmişəm. “Neftçi”nin futbolçusu olmaq şansım yarananda bir an belə düşünmədim, dedim ki, “mən hazıram”. Mənə zəng vurub, 2 illik müqavilə ilə bağlı xəbər verəndə, dərhal evdə əşyalarımı toplayıb tibbi müayinə üçün Antalyaya uçdum. Mən çox istəyirdim ki, “Neftçi”nin futbolçusu olum. Çünki bu, tarixi olan çox güclü klubdur, davamlı olaraq avrokuboklarda çıxış edir və Azərbaycan çempionluğu uğrunda mübarizə aparır. Buna görə də müqavilə bağlayıb-bağlamamaq haqda düşünməyə və ya tərəddüd etməyə bir səbəb yox idi”.
Təcrübəli futbolçu hədəflərindən də söz açıb: “Harada oynayıramsa, həmişə maksimum hədəflərim olur. Yenə deyirəm, bu komanda yüksək səviyyədədir və çox yaxşı futbolçuları var. Bütün futbolçular çox yaxşı başa düşürlər ki, burada yalnız birinci yer uğrunda mübarizə aparmaq lazımdır.
Uyğunlaşma prosesi mənim üçün çox asan oldu. Çoxdan tanıdğım kapitanımız Emin Mahmudov məni komandaya çox gözəl qəbul etdi. Rusiyada uzun illər qarşı-qarşıya oynadığım uşaqlar var. Belə bir hissiyatım var, sanki azı 2 ildir buradayam”.
“1000-1500 mesaj yazıb soruşurdular ki, bu doğrudurmu”
Solomon Kvirkveliya Türkiyədəki təlim-məşq toplanışını da dəyərləndirib: “Toplanış əla gedir. Bu belə də olmalıdır. Biz məşq edirik. Ən əsası odur ki, bütün futbolçular sağlamdır və yükləmələrdən sonra hamı özünü yaxşı hiss edir. Artıq iki yoxlama oyunu keçirmişik. İlk matç mənim üçün çətin oldu. Bəlkə, çox da çətin olmadı, amma ikinci oyundakı kimi rahat deyildi. Gündən günə, oyundan oyuna forma yığırıq və özümüzü daha da yaxşı hiss edirik.
Məşqçimiz şəxsən mənim üçün həm məşqçi, həm də bir insan kimi çox yaxşıdır. Mən bura gələndə o mənə çox dəstək oldu. Dedi ki, məşqdə nəsə alınmasa, məni həmişə dəstəkləyəcək. Mənim də onun dəstəyinə ehtiyacım var idi. Bunun üçün ona minnətdaram və hər gün daha yaxşı məşq edib özümü göstərməyə hazıram”.
Gürcü futbolçu sonda “Neftçi” azarkeşləri ilə bağlı fikirlərini bildirib: “Bilirəm ki, klubumuzun çox yaxşı azarkeşləri var. Müqavilə bağlamağım haqda söz-söhbət yarananda onlar mənə çox yazırdılar. Haradasa 1000-1500 mesaj yazıb soruşurdular ki, bu doğrudurmu? Amma o vaxt rəsmi müqavilə imzalamamışdım deyə, onlara cavab verə bilmirdim. Azarkeşlərdən hiss etdiklərimə, kluba keçidimdən məmnun olduqlarına görə onlara təşəkkür edirəm”.
