Futbol üzrə Azərbaycan millisinin müdafiəçisi Toral Bayramov “Bursaspor”un bu gün “Sivasspor” komandasına qarşı keçirdiyi matçı buraxıb.
Arena.az xəbər verir ki, Bursa təmsilçisi Türkiyə Birinci Liqasının 2026/2027-ci illər mövsümünün 15-ci turu çərçivəsində bu gün “Sivasspor”u qəbul edib.
Sözügedən komanda bu rəqiblə ev oyunundan 2:0 hesablı inamlı qələbə ilə ayrılıb. Toral matçın sonadək ehtiyatda qalıb.
“Bursaspor” hazırda 35 xalla yarış cədvəlinin 1-ci pilləsində qərarlaşıb. Toralın komandası cari mövsümdə keçirdiyi 15 oyunda 11 qələbə qazanıb, 2 heç-heçə edib, 2 məğlubiyyətə üzülüb.
Xatırladaq ki, Toral Bayramov bu ilin iyun ayında “Qarabağ”dan “Bursaspor”a keçib. Müdafiəçinin Türkiyə klubu ilə 2029-cu ilin 30 iyununa qədər müqaviləsi mövcuddur. O, Bursa təmsilçisinin heyətində 11 oyun keçirib, 1 məhsuldar ötürmə və 1 avtoqolla yadda qalıb.
2020-ci ildən “Qarabağ”ın əsas komandasında çıxış edən Toral Bayramov bu müddətdə 254 oyunda 37 qol vurub, 46 məhsuldar ötürmə verib. O, komanda ilə 5 dəfə Azərbaycan çempionu olub, 2 dəfə Azərbaycan Kubokunu qazanıb.
Bayramov 2021-ci ildə debüt etdiyi Azərbaycan millisinin heyətində meydana çıxdığı 48 oyunda 6 qola imza atıb, 6 məhsular ötürmə verib. Toral əvvəllər U-19 və U-21 yığmalarımızın da formasını geyinib.


