Futbol üzrə UEFA Super Kubokunun 2022-ci il üçün qalibi müəyyənləşib. Arena.az xəbər verir ki, həlledici matçda “Real” (İspaniya) və “Ayntraxt” (Almaniya) komandaları qarşılaşıb.
Madrid klubu UEFA Çempionlar Liqasının, Frankfurt təmsilçisi isə Avropa Liqasının son qalibi kimi Super Kubok matçında oynamaq hüququ qazanmışdı. Sözügedən komandalar Finlandiyanın paytaxtı Helsinkidə, Olimpiya Stadionunda üz-üzə gəliblər.
Bu komandalar 62 ildən sonra yenidən avrokubokların finalında qarşılaşıb. İspaniya və Almaniya təmsilçiləri daha əvvəl 1959/1960 mövsümündə UEFA Çempionlar Kubokunun həlledici oyununda bir-birinə rəqib olmuşdu. Həmin matçda 7:3 hesablı qələbə qazanan Madrid klubu ardıcıl 5-ci dəfə titula sahib çıxmışdı. Buna kimi 7 dəfə Super Kubok matçına çıxmış “Real” bunların 4-də qələbə qazanmışdı. “Ayntraxt” isə ilk dəfə belə bir oyunda iştirak edirdi.
Bu qarşılaşmanın taleyini 2 qol həll edib. “Real” rəqibini hər hissədə bir qol vurmaqla məğlub edib. İlk yarıda David Alaba, ikinci hissədə isə Kərim Benzema rəqib qapısına yol tapıb.
Xatırladaq ki, indiyədək bu titula ən çox “Barselona” ilə “Milan” yiyələnmişdi. Hər iki komanda 5 dəfə UEFA Super Kubokunun qalibi olmuşdu. Bugünkü zəfəri sayəsində “Real” da zirvəyə şərik çıxıb.
UEFA Super Kuboku
10 avqust
Real – Ayntraxt 2:0
Qol: Alaba, 37. Benzema, 65.
Baş hakim: Maykl Oliver.
Helsinki. Olimpiya Stadionu.
