Futbol üzrə Azərbaycan milli komandasının cinah hücumçusu Vüsal İsgəndərli Kosovo klubu “Malişeva”nın heyətində növbəti oyununa çıxıb.
Arena.az xəbər verir ki, 29 yaşlı futbolçunun komandası Kosovo çempionatının 2026/2027-ci illər mövsümünün 11-ci turu çərçivəsində “Dreniça” ilə üz-üzə gəlib.
“Malişeva” bu rəqiblə səfərdə baş tutmuş oyundan 2:0 hesablı qələbə ilə ayrılıb. Vüsal bu görüşün start heyətində yer alıb və komandasının qələbəsində pay sahiblərindən biri olub.
“Malişeva” bu nəticədən sonra 26 xalla yarış cədvəlinin 1-ci pilləsində qərarlaşıb. İsgəndərlinin komandası 11 oyuna 8 qələbə qazanıb, 2 heç-heçə edib, 1 məğlubiyyətə üzülüb.
Xatırladaq ki, Vüsal İsgəndərli “Malişeva”ya bu yay qoşulub. O, Kosovo klubunun heyətində 4 qol vurub, 1 məhsuldar ötürmə müəllifi olub.
Millimizin futbolçusu daha öncə Albaniyanın “Partizani”, “Eqnatiya”, “Şamaxı”, “Zirə”, “Sumqayıt”, “Ankara Keçiörengücü”, “Boluspor” və “Simurq”da da forma geyinib. 2019-cu ilin noyabrında Azərbaycan millisində debüt etmiş 29 yaşlı hücumçu meydana çıxdığı 7 oyunda 1 qola imza atıb, 1 məhsuldar ötürmə verib.
