AFFA tərəfindən 19 yaşadək futbolçular arasında təşkil olunmuş Gənclər Liqasında 2024/2025 mövsümünün qalibləri mükafatlandırılıblar.
Arena.az xəbər verir ki, “ASK Arena”da təşkil edilmiş tədbirdən əvvəl keçirilən son turun oyununda “Qəbələ” “Sabah”ı 5:1 hesabı ilə məğlub edib. Ardından mükafatlandırma mərasimi baş tutub.
Gənclər Liqasında 3-cü yeri tutmuş “Qarabağ” bürünc, 2-ci pillənin sahibi “Qəbələ” gümüş medallarla təltif olunublar. Çempion “Sabah”a isə qızıl medallar və kubok təqdim edilib.
Həmçinin fərdi nominasiyalar üzrə qaliblər bəlli olub. Son turda “poker”ə imza ataraq ümumi qol sayını 45-ə çatdıran və bombardirlər yarışında birinci pilləyə yüksəlmiş “Qəbələ”nin futbolçusu Rəvan Əsədov ən məhsuldar oyunçuya verilən mükafatın sahibi olub. İştirakçı komandalar arasında keçirilmiş sorğuya və 19 yaşadək futbolçulardan ibarət Azərbaycan millisinin baş məşqçisi Elxan Abdullayevin rəyinə əsasən, mövsümün ən yaxşı oyunçusu isə “Qarabağ”ın üzvü Hikmət Cəbrayılzadə seçilib.
Mükafatlandırma mərasimində AFFA Məşqçilər Komitəsinin sədri Vaqif Sadıqov və AFFA-nın Yarışların Təşkili Departamentinin rəhbəri Emin Cəfərov iştirak ediblər.
