“Qarabağ”ın baş məşqçisi Qurban Qurbanov Avropa Liqasının 1-ci təsnifat mərhələsində “Vestri” ilə cavab oyunundan öncə fikirlərini bölüşüb.
Arena.az xəbər verir ki, İslandiya və Azərbaycan təmsilçiləri arasındakı cavab qarşılaşması sabah Reykyavikdə baş tutacaq.
Qurban Qurbanov bu gün oyundan öncə təşkil etmiş mətbuat konfransında bunları söyləyib:
“Komandamız oyuna tam hazırdır. Həm rəqibi artıq yaxından tanıyırıq, həm də oyunumuzu analiz etmişik. Düzdür, uzun yol qət etmişik, yorğunluq var. Buna baxmayaraq, inanıram ki, futbolçular sabah matça tam hazır olacaqlar və özlərini yaxşı motivasiya edəcəklər. Hava durumu da əlverişlidir, əsl futbol havasıdır.
Heyətdə müəyyən dəyişikliklər ola bilər. Lakin kimin meydana çıxmasından asılı olmayaraq, hər kəs əlindən gələni edəcək. Start heyəti ilə bağlı qərar vermək üçün sabaha qədər vaxtımız var. Çalışacağıq ki, oyundan öncə konkret fikrimizi müəyyənləşdirib həyata keçirək”.
Xatırladaq ki, bu komandalar arasında keçirilmiş ilk matçda “Qarabağ” “Vestri”yə 3:0 hesabı ilə qalib gəlib.
