“France Football” jurnalı 2025/26 mövsümünün ən yaxşı futbolçusuna veriləcək “Qızıl top” mükafatına namizəd olan 30 futbolçunun adını açıqlayıb.
Arena.az xəbər verir ki, siyahıda Fransa çempionu PSJ-dən 10 futbolçunun yer alması mükafat tarixində rekorddur.
Ötən il Paris klubundan 9 futbolçu namizəd göstərilmişdi. 2018-ci ildə 8 namizədlə “Real” bu göstərici üzrə rekordçu olmuşdu.
Namizədlərin tam siyahısı:
Müdafiəçilər: Mark Kukurelya (“Real”), Pau Kubarsi (“Barselona”), Dayo Upamekano (“Bayern”), Vilyam Saliba, Qabriel Maqalyans (hər ikisi “Arsenal”), Markinyos, Əşrəf Hakimi, Vilyam Paço, Nuno Mendes (hamısı PSJ);
Yarımmüdafiəçilər: Cud Bellingem (“Real”), Deklan Rays (“Arsenal”), Bruno Fernandes (“Mançester Yunayted”), Joao Neves, Vitinya, Fabian Ruis (hamısı PSJ), Rodri (“Barselona”);
Hücumçular: Usman Dembele, Xviça Kvaratsxeliya, Ferran Torres (hamısı PSJ), Lamin Yamal (“Barselona”), Sadio Mane (“Əl-Nəsr”), Lautaro Martines (“İnter”), Kilian Mbappe (“Real”), Erlinq Holand (“Mançester Siti”), Lionel Messi (“İnter Mayami”), Harri Keyn, Luis Dias, Maykl Olise (hamısı “Bayern”), Xulian Kinyones (“Əl-Qadisiyə”).
“Qızıl top” mükafatı “France Football” jurnalının keçmiş baş redaktoru Qabriel Ano tərəfindən təsis edilib. İlk dəfə 1956-cı ildə İngiltərənin “Blekpul” klubunun hücumçusu Stenli Metyuza təqdim olunan mükafatın qalibi futbol jurnalistlərinin səsverməsi ilə müəyyənləşdirilir.
İlk illərdə mükafata yalnız avropalı futbolçular namizəd ola bilirdisə, 1995-ci ildən etibarən Avropanın klubunda çıxış edən istənilən millətdən futbolçu bu mükafata namizəd göstərilə bilərdi. 2007-ci ildən isə dünyanın istənilən klubunda çıxış edən futbolçular “Qızıl top” uğrunda mübarizə apara bilirlər.
Qeyd edək ki, ötən il “Qızıl top”u Usman Dembele qazanıb. Mükafatın rekordçusu isə 8 dəfə qalib olan Lionel Messidir.
2026-cı il “Qızıl top” mükafatının təqdimetmə mərasimi oktyabrın 26-da Londonda keçiriləcək. Bu, mərasimin tarixdə ilk dəfə Parisdən kənarda təşkil olunması olacaq.
