“Hall Siti”nin vingeri Sorba Tomas klubun bazası yaxınlığında avtomobil qəzasına düşüb, lakin futbolçu hadisədən xəsarətsiz qurtulub.
Arena.az xəbər verir ki, 27 yaşlı futbolçu məşqə gedərkən Kottingemdə yerləşən klubun məşq bazası yaxınlığında qəza törədib.
Hadisə zamanı Tomasın idarə etdiyi avtomobilin aşdığı bildirilib. “Hall Siti”nin mətbuat xidməti futbolçunun heç bir xəsarət almadığını və avtomobildən tamamilə salamat çıxdığını açıqlayıb.
Klubun yaydığı açıqlamada deyilir: “Sorba Tomasın klubun məşq bazası yaxınlığında baş verən yol-nəqliyyat hadisəsində xəsarət almadığını rahatlıqla təsdiqləyirik. Klub sosial şəbəkələrdə avtomobilin fotolarının yayıldığından xəbərdardır və azarkeşləri əmin edə bilər ki, futbolçu heç bir xəsarət almayıb və avtomobilindən tamamilə salamat çıxıb”.
Sorba Tomas bu ilin sentyabr ayında “Hall Siti”yə keçib. Bundan əvvəl “Stok Siti”də çıxış edən futbolçu yeni komandasında 2 matç keçirib və məhsuldar fəaliyyətlə yadda qalmayıb.
Uels millisinin üzvü olan vinger milli komandada 27 oyuna çıxıb, 2 qol vurub və 5 məhsuldar ötürmə edib.
Qeyd edək ki, “Hall Siti” ötən mövsümün nəticələrinə əsasən İngiltərə futbolunun elitasına qayıdıb. Komanda Premyer Liqanın ilk 3 turundan sonra 7 xalla turnir cədvəlinin ilk üçlüyündə yer alır. “Hall Siti” növbəti matçını sentyabrın 12-də səfərdə “Çelsi”yə qarşı keçirəcək.
