“Əl-Nəsr”in ulduz hücumçusu Kristiano Ronaldo Portuqaliya millisinin düşərgəsini tərk etdikdən sonra yığmadakı çıxışlarını başa vura bilər.
Arena.az xəbər verir ki, bu barədə “Marca” nəşri məlumat yayıb.
Daha əvvəl “Marca” 41 yaşlı hücumçunun UEFA Millətlər Liqasının qrup mərhələsinin 3-cü turunda Danimarka ilə oktyabrın 1-də keçiriləcək oyundan əvvəl milli komandanın düşərgəsini tərk etdiyini yazıb. Ronaldo turnirin əvvəlki turunda Norveçə qarşı keçirilən və Portuqaliyanın 2:1 hesablı qələbəsi ilə başa çatan görüşdə meydana çıxmayıb.
Ronaldo Portuqaliya millisinin tarixində ən çox qol vuran futbolçudur. Onun yığmanın heyətində 146 qolu var.
Beşqat “Qızıl top” sahibi olan hücumçu karyerası ərzində 5 dəfə UEFA Çempionlar Liqasının qalibi olub, Avropa çempionu və ikiqat UEFA Millətlər Liqası qalibi adını qazanıb. O, həmçinin milli komandalar, Avropa çempionatları, UEFA Çempionlar Liqası və klublararası dünya çempionatları tarixində qol rekordlarına sahibdir.
Kristiano Ronaldo 2022-ci ilin dekabrından Səudiyyə Ərəbistanının “Əl-Nəsr” klubunda çıxış edir. Karyerası ərzində “Sportinq”, “Mançester Yunayted”, “Real” və “Yuventus”un da formasını geyinib.
Ümumilikdə onun hesabında 979 qol var. Bunlardan 146-sı milli komandada, 833-ü isə klub səviyyəsində vurulub.
