İngiltərənin “Everton” klubu kapitan Şeymus Koulmen ilə müqavilənin müddətini artırıb. Arena.az xəbər verir ki, bu barədə Premyer Liqa təmsilçisinin rəsmi saytı məlumat yayıb.
32 yaşlı futbolçu ilə yeni müqavilə 2023-cü ilin yayına kimidir. Əvvəlki sözləşmənin müddəti 2022-ci ilin yayında bitəcəkdi.
Şeymus Koulmen “Slayqo Rovers” klubunun yetirməsidir. Təcrübəli sağ cinah müdafiəçisi 2009-cu ildə məhz bu klubdan 60 min funt-sterlinqə “Everton”a transfer olunub. İrlandiyalı futbolçu yalnız 2010-cu ildə qısa müddət “Blekpul”da icarədə oynayıb. “Everton”un heyətində bütövlükdə 350 matça çıxan müdafiəçi, bu görüşlərdə 26 qol da vurub.
Koulmen İrlandiya yığmasında da 59 matça çıxıb, 1 qolla yadda qalıb.
