Martın 16-da Hindistanın paytaxtı Yeni Dehlidə qadın boksçular arasında dünya çempionatı start götürəcək. Arena.az xəbər verir ki, 10 gün davam edəcək mundialda Azərbaycan milli komandası da mübarizə aparacaq.
Baş məşqçi Yadigar Məmmədov və məşqçi İlkin Ağayevin rəhbərliyi altında 6 boksçumuz gücünü yoxlayacaq. Dünya çempionatının mükafatları uğrunda Günel Rəhimova (48 kq), Anaxanım İsmayılova (50 kq), Zeynəb Rəhimova (54 kq), Məhsəti Həmzəyeva (57 kq), Şəhla Allahverdiyeva (66 kq) və Aynur Rzayeva (75 kq) rinqə çıxacaqlar.
Bu gün səfərə yollanan Azərbaycan yığması martın 27-də Bakıya qayıdacaq.
Xatırladaq ki, 2.4 milyon ABŞ dolları mükafat fondu olan qadın boksçular arasındakı bu mundialın püşkü martın 15-də atılacaq. 77 ölkənin qatılacağı gözlənilən yarışın qalibi 100, finalçısı 50, bürünc medalçısı 25 min dollar qazanacaq.
