Almaniya yığmasının kapitanı, mərkəz yarımmüdafiəçisi İlkay Gündoğan AÇ-2024 ərəfəsində azarkeşlərə məktub ünvanlayıb.
Arena.az xatırladır ki, bu gün Münhendəki “Alyans Arena”da baş tutacaq AÇ-2024-ün açılış oyununda Almaniya millisi Şotlandiya yığmasını qəbul edəcək.
“Əziz azarkeşlər, bugünkü oyun mənim üçün gerçəkləşən xəyaldan daha artıqdır: komandamı ev yarışında kapitan kimi meydana çıxarmaq – bunu sadəcə düşünmək belə, məni ürpədir. Bir komanda olaraq son illərdəki səyahətimiz kələ-kötür və uğursuzluqlarla dolu olduğu kimi, mən də milli komanda formasında çətin bir karyeraya nəzər sala bilərəm. Böyük bir yarışda köç keçmişi olan ilk kapitan kimi Almaniyanı meydana çıxarmaqdan daha da qürur duyuram. Mən, çox fərqli mədəniyyətləri və ölkələri bir arada ehtiva edən xüsusi komandanı arxamca apara bilərəm. 2024-cü ildə bizi, Almaniya komandasını güclü edəcək amillər məhz bunlardır: müxtəliflik və müxtəlif mədəniyyətlərin təsiri. Keçmişdə öyrəndiyimiz və hiss etdiyimiz məqam budur ki, futbol insanları birləşdirmək gücünə malikdir. Biz daha və daha artıq cəbhələrin baş qaldırdığı bir dövrdə yaşayırıq. İnsanlar artıq bir-birini dinləmirlər. Cəmiyyətimizdə parçalanma hökm sürür.
“Avropa çempionu olmaq istəyirik”
Bir komanda olaraq biz ölkəmizi növbəti dörd həftə ərzində bir-birinə daha da yaxınlaşdırmaq, onun yenidən birləşməsinə kömək etmək istəyirik ki, insanlar özlərinin Almaniya yığması ilə fəxr edə bilsinlər, eyni zamanda yaxın bir neçə həftə ərzində gözəl ölkəmizə gələcək, onları ziyarət edəcək milyonlarla ziyarətçiyə açıq, hörmətli və mehriban ola bilsinlər. Avropa çempionu olmaq istəyirik. Amma sonda qənimət qazanmasaq belə, yenə də yaxşı yarış olacaq. 2006-cı ildə olduğu kimi, mən 15 yaşlı bir yeniyetmə ikən azarkeşlərin əhval-ruhiyyəli bayramında iştirak edə bildim. Biz yalnız üçüncü yeri tutsaq da, yay nağılını bayram etdik. Demək gərəkdir ki, bəzi komandalar bizdən azacıq sabit və daha hazırlıqlıdırlar. Ancaq azarkeşlərimizin fantastik dəstəyi ilə bu ev Avropa çempionatını bir çox səviyyələrdə qazana bilərik. Yaxşı ev sahibləri, çoxmədəni cəmiyyət olaraq və ümidvaram, meydanda, lütfən, xəyalımıza birlikdə çatmağımıza kömək edin!”, – İlkay Gündoğan məktubunda qeyd edib.
Xatırladaq ki, sayca 17-ci Avropa çempionatının final mərhələsi Almaniyada keçiriləcək. Bu gün, iyunun 14-də başlayacaq qitə birinciyili düz bir ay – iyulun 14-dək davam edəcək. AÇ-2024-ün oyunlarına Almaniyanın 10 şəhərinin 10 stadionu ev sahibliyi edəcək.
Almaniya millisi qitə birinciliyində Şotlandiya, Macarıstan və Avstriya yığmalarının yer aldığı “A” qrupunda mübarizə aparacaq.
