Azərbaycan Cüdo Federasiyasının (ACF) hakimlər heyətinin üzvü Akif Tahirov A kateqoriyalı hakim statusu əldə edib.
Arena.az xəbər verir ki, bu barədə Azərbaycan Cüdo Federasiyasının mətbuat xidməti məlumat yayıb.
Xəbərdə bildirilir ki, Kanadanın Alberta əyalətinin Kalqari şəhərində Beynəlxalq Cüdo Federasiyası (BCF) tərəfindən hakimlər üçün A kateqoriyalı beynəlxalq dərəcəli hakim adının alınması üçün imtahan keçirilib. İmtahanda A.Tahirov da iştirak edib.
Hakimlər nəzəri hissəyə dair imtahan veriblər. Daha sonra, 15-17 sentyabrda keçirilən böyüklər arasında Pan-Amerika və Okeaniya çempionatında görüşləri idarə edərək praktiki imtahan veriblər. Həm nəzəri, həm də praktiki imtahanı yüksək nəticə ilə keçən A.Tahirov A kateqoriyalı yüksək hakimlik lisenziyasını əldə edib.
Qeyd edək ki, Akif Tahirov yarışda kişilər arasında 60 kq. çəkidə bürünc medal uğrunda görüşdə və 81 kq. çəkidə final görüşündə, qadınlar arasında isə 63 kq. çəki dərəcəsində final görüşündə hakimlik edib. Komanda yarışlarında isə o, final görüşlərində ədalət təmsilçiləri arasında yer alıb.
