2024-cü ilin 1-3 noyabrında Azərbaycanda keçirilməsi nəzərdə tutulan cüdo üzrə “Böyük Dəbilqə” yarışının vaxtı dəyişdirilib.
Arena.az xəbər verir ki, bu barədə Azərbaycan Cüdo Federasiyasının rəsmi saytı məlumat yayıb.
Xəbərdə bildirilir ki, bu barədə Beynəlxalq Cüdo Federasiyası müvafiq qərar verib. Belə ki, “Dünya Cüdo Turu” seriyasına daxil olan nüfuzlu turnir 16-18 fevral 2024-cü ildə keçiriləcək. Tədbir Bakıdakı Milli Gimnastika Arenasında baş tutacaq.
“Bu tarixlərdə daha öncə Təl-Əviv “Böyük Dəbilqə” yarışının keçirilməsi planlaşdırılırdı. Məlum hadisələrə görə təhlükəsizlik baxımından BCF bu turnirin keçirilməsini təxirə saldıqdan sonra biz gələn ilin noyabrında keçirilməsi nəzərdə tutulan Bakıdakı yarışın 16-18 fevral 2024-cü il tarixinə keçirilməsini təklif etdik. Təklifimizə müsbət cavab verdikləri üçün BCF-ə təşəkkürümüzü bildiririk”. Bu sözləri Azərbaycan Cüdo Federasiyasının baş katibi Rəşad Rəsullu bildirib.
O, həmçinin vurğulayıb ki, yarışın fevral ayına keçirilməsi burada toplanacaq xalların Paris 2024 Yay Olimpiya Oyunlarına lisenziya reytinq xallarının toplanmasına imkan verəcək: “Yarış noyabr ayında olsaydı, Olimpiya Oyunlarından sonra baş tutacağına görə iştirakçı sayı əhəmiyyətli dərəcədə azalacaqdı. Həmçinin, bu yarış zamanı ev sahibi kimi hər çəkidə 4 idmançı sifariş edə biləcəyimizdən, bu da Olimpiya Oyunlarına lisenziya xallarının qazanılması baxımından müəyyən üstünlük yaradacaq”.
Azərbaycan Cüdo Federasiyası bütün idman həvəskarlarını qeyd edilən tarixlərdə Milli Gimnastika Arenasına dəvət etməyi də unutmayıb. ACF azarkeşləri dünyanın ən güclü cüdo ustalarının çıxışlarına tamaşa etməklə yanaşı, idmançılarımıza öz güclü dəstəklərini verməyə çağırır.
