Coşqun Diniyev Türkiyənin “Ümraniyəspor”, Bəxtiyar Həsənalızadə isə “Tuzlaspor” komandasında növbəti matçlarına çıxıblar.
Arena.az xəbər verir ki, futbolçularımızın komandaları bu gün Türkiyə Birinci Liqasının 11-ci turu çərçivəsində bir-biri ilə qarşılaşıblar.
Sözügedən kollektivlər “Ümraniyəspor”un meydanında üz-üzə gəliblər. Tərəflər yekunda meydanı heç-heçə ilə tərk ediblər – 1:1. Hesabı 14-cü dəqiqədə “Ümraniyəspor” açsa da, “Tuzlaspor” 20-ci dəqiqədə bərabərlik qolunu vurub. Qalan dəqiqələrdə hesab dəyişməz qalıb.
Coşqunla Bəxtiyar start heyətdə meydana çıxıblar. Onlar sonadək meydanda qalıblar.
Bu heç-heçədən sonra “Ümraniyəspor” 9 xalla 16-cı, “Tuzlaspor” isə 8 xalla 17-ci pillədə qərarlaşıb.
Xatırladaq ki, Coşqun Diniyev “Ümraniyəspor”la bu ilin iyul ayında 1+1 illik müqavilə bağlayıb. 27 yaşlı futbolçu sözügedən komandanın heyətində indiyə qədər 12 oyuna çıxıb, 1 qola imza atıb, 1 məhsuldar ötürmə müəllifi olub.
Bəxtiyar Həsənalızadə də “Tuzlaspor”la bu ilin avqust ayında 2 illik müqavilə bağlayıb. 30 yaşlı futbolçu Türkiyə təmsilçisində 8 oyuna çıxıb və 1 qol vurub.
