Polşanın Poznan şəhərində gənclər arasında təşkil olunmuş Avropa Kubokuna bu gün – aprelin 6-da yekun vurulub.
Arena.az xəbər verir ki, ilk yarış günündə cüdoçularımızın qazancı 2 qızıl və 2 bürünc medal olub.
-60 kq çəki dərəcəsinə tatamiyə çıxan Fərid Qarayev və -66 kq çəkidə mübarizə aparan Məhəmməd Musayev bütün rəqiblərinə qalib gələrək fəxri kürüsünün ən yüksək pilləsinə qalxıblar. Nihad Məmişov (-60 kq) və Əbil Yusubov (-73 kq) isə bürünc medal qazanıblar.
İkinci yarış günündə cüdo üzrə milli komandamız hesabına daha 1 qızıl və 2 gümüş medal yazdırıb.
+100 kq çəki dərəcəsinə tatamiyə çıxan Ramazan Əhmədov bütün rəqiblərinə qalib gələrək çempion adını qazanıb.
Süleyman Şükürov (-81 kq) və Tuncay Şamil (-90 kq) gümüş medala sahib çıxıblar.
Ümumilikdə 7 medal qazanmış gənclərdən ibarət Azərbaycan yığması Avropa kubokunu oğlanların mübarizəsində 23 ölkə arasında birinci, ümumi sıralamada ikinci pillədə tamamlayıb.
Xatırladaq ki, bu turnirə 23 ölkədən 412 cüdoçu qatılıb.
