“Mançester Yunayted” futbol üzrə İngiltərə Premyer Liqasının 2026/2027-ci illər mövsümündə son 40 ilin ən uğursuz başlanğıcını edib.
Arena.az xəbər verir ki, Maykl Kerrikin rəhbərlik etdiyi komanda çempionatın ilk 6 turunda cəmi 6 xal toplayıb.
“Qırmızı şeytanlar” sonuncu dəfə 1986/1987-ci illər mövsümünün eyni mərhələsində daha az xal toplamışdılar. Həmin vaxt komandanın hesabında 4 xal var idi.
“Mançester Yunayted” 6-cı turda “Tottenhem”lə qarşılaşıb. Görüş 1:1 hesabı ilə başa çatıb. Mançester təmsilçisi 73-cü dəqiqədə Brayan Mbeumonun qolu ilə önə keçsə də, Dominik Solanke 90+2-ci dəqiqədə hesabı bərabərləşdirib.
Kerrik: “Qələbələrə qayıtmağın vaxtıdır”
Maykl Kerrik matçdan sonra komandasının potensialından aşağı çıxış etdiyini etiraf edib:
“Bir sıra səbəblərdən imkanlarımızdan aşağı səviyyədə oynadıq. Komandanın çətin mərhələdən keçdiyi hiss olunurdu. Fasilədən sonra, məncə, bütün komponentlər üzrə daha yaxşı təsir bağışladıq. İstədiyimizə nail olduq və çox əlverişli vəziyyətə düşdük. Sadəcə üstünlüyümüzü qorumalı idik.
Azarkeşlərin fitə basması xoş deyil. Bu, mənə həqiqətən ağrı verir, çünki bu klub mənim üçün yad deyil. Amma azarkeşlərin məyusluğunu da başa düşürəm. Açığını desəm, artıq qələbələrə qayıtmağın vaxtıdır”, – deyə baş məşqçi bildirib.
Qari Nevill: “Komandanın oyunu narahatlıq doğurur”
“Mançester Yunayted”in sabiq müdafiəçisi, hazırda “Sky Sports” telekanalında ekspert kimi çalışan Qari Nevill də komandanın çıxışını tənqid edib:
“Bu, “Tottenhem”in layiq olduğu xaldır. Onlar rəqibindən xeyli güclü təsir bağışladılar. Bu oyundan xalsız ayrılmaq onlar üçün əsl fəlakət olardı. Maykl Kerrikin düşünməli olduğu çox şey var. Komandanın bugünkü oyununun səviyyəsi narahatlıq doğurur. Qarşıda isə onları çox vacib bir həftə gözləyir”.
