İtaliya Kubokunun “Atalanta” ilə final oyunundakı qələbə “Yuventus”un baş məşqçisi Massimiliano Alleqri üçün əlamətdar olub.
Arena.az xəbər verir ki, ötən gecə Romadakı “Olimpiko” stadionunda baş tutan həlledici oyunda “Yuventus” “Atalanta”nı 1:0 hesabı ilə məğlub edərək, tarixində 15-ci dəfə İtaliya Kubokuna sahib olub.
“Byankoneri”nin baş məşqçisi Alleqri üçün bu oyun İtaliya Kubokunda qazandığı qalibiyyətlərin sayı baxımından əlamətdardır.
Belə ki, italyan mütəxəssis İtaliya Kubokunda 5-ci dəfə qalib olaraq, bu göstricidə mütləq rekordu müəyyənləşdirib. Alleqri həmkarları, hərəyə 4 zəfər qazanmış məşqçilər – italyan mütəxəssis Roberto Mançinini və həmçinin isveçli mütəxəssis Sven-Yoran Erikssonu geridə qoyub.
Massimiliano Alleqri “qoca sinyora”ya 5 dəfə – 2014/2015, 2015/2016, 2016/2017, 2017/2018 və 2023/2024-cü illər mövsümündə İtaliya Kubokunda qalibiyət sevinci yaşadıb.
Xatırladaq ki, Alleqri “Yuventus”u 2021-ci ilin may ayından çalışdırır. İtalyan mütəxəssisin “qoca sinyora” ilə müqaviləsi 2025-ci ilin iyun ayının sonuna qədər qüvvədədir.
Alleqri buna qədər 2014-2019-cu illərdə “byankoneri”ni çalışdırıb. Ümumilikdə Alleqri “Yuventus”a 5 dəfə İtaliya A Seriyasını, 5 dəfə İtaliya Kubokunu, 2 dəfə İtaliya Super Kubokubu qazandırıb. O, həmçinin Turin təmsilçisi ilə 2 dəfə Çempionlar Liqasının finalçısı olub.
