İngiltərənin “Arsenal” klubunun braziliyalı hücumçusu Qabriel Jezus futbol oynayarkən daim fiziki ağrı hiss etdiyini bildirib.
Arena.az xatırladır ki, Jezus bu yaxınlarda dizindən aldığı zədədən sağalıb və bu səbəbdən “topçular”ın heyətində 5 oyunu buraxıb.
“Bəzən mən bunu dizimdə hiss edirəm. Sonuncu dəfə nə vaxt ağrısız futbol oynadığımı xatırlamıram. Ruhumu güclü tutmağa çalışıram”, deyə Jezus vurğulayıb.
“Palmeyras”ın yetirməsi olan Qabriel Jezus “Arsenal”a 2022-ci ilin iyulunda 52,2 milyon avro qarşılığında “Mançester Siti”dən keçib. “Qabbi”nin “topçular”la müqaviləsi 2027-ci ilin iyun ayının sonuna qədər qüvvədədir.
Cari mövsümdə Jezus komandasının heyətində 28 oyuna 8 qol, 5 məhsuldar ötürmə ilə fərqlənib. O, “topçular”ın heyətində bütövlükdə 61 oyun keçirib, 19 qol və 12 məhsuldar ötürmə ilə yadda qalıb.
Jezus 2016-cı ilin sentyabrında debüt etdiyi Braziliya yığmasının heyətində 64 oyuna 19 qol vurub, 13 məhsuldar ötürmə verib.
“Transfermarkt” internet-portalı 27 yaşlı Qabriel Jezusu 70 milyon avro məbləğində qiymətləndirir.
