İspaniyanın “Atletik” klubu yarımmüdafiəçisi Raul Qarsiya ilə müqavilənin müddətini uzadıb.
Arena.az xəbər verir ki, bu barədə La Liqa təmsilçisinin mətbuat xidməti məlumat yayıb.
34 yaşlı futbolçu ilə müddəti 2022-ci ilin yayına qədər olan yeni müqavilə imzalanıb. Əvvəlki anlaşmanın müddəti bu ilin yayında başa çatacaqdı.
Qarsiya 2015-ci ildən “Atletik”də çıxış edir. Yarımmüdafiəçi bu mövsüm meydana çıxdığı 27 oyunda 7 qola imza atıb.
Xatırladaq ki, Raul ötən ay La Liqada yeni rekorda imza atıb. İspan futbolçu 21-ci əsrdə Primeroda 100 qol vuran ilk yarımmüdafiəçi olub.
Qarsiya buna 20-ci tur çərçivəsində keçirilən “Xetafe” ilə oyunda nail olub. Belə ki, təcrübəli futbolçu 5:1 hesabı ilə qalib gəldikləri bu görüşdə dubla imza atıb.
Raul Qarsiya hazırkı komandasında 55, “Atletiko”da 26, “Osasuna”da isə 20 qol vurub.
