Madrid “Atletiko”sunun baş məşqçisi Dieqo Simeone İspaniya La Liqasının 23-cü turunda “Real”la səfər heç-heçəsini (1:1) şərh edib.
Arena.az AS dərgisinə istinadən, argentinalı mütəxəssisin bu barədə fikirlərini təqdim edir:
“Hər iki komanda üçün zəif oyun idi. “Real” bizdən yaxşı idi, amma oyun əla alınmadı. Komandalar ölçülü-biçili, ehtiyatlı oynayırdılar, heç kim səhv etmək istəmirdi. İkinci hissə də buna bənzərdi. Vurduğumuz qol heç-heçə etməyə imkan verdi ki, bu da çempionatda mübarizəmizi davam etdirməyə kömək edəcək.
“Atletiko” oyunun sonuna qədər 1 xal qazanmaq istəyirdi. Komanda qol vurmaq üçün fürsət axtarmağa davam etdi və nəticədə layiqli heç-heçəyə nail oldu”, deyə Dieqo Simeone bildirib.
“Real” 58 xalla La Liqanın turnir cədvəlinə başçılıq edir. “Atletiko” 48 xalla 4-cü pillədə qərarlaşıb.
