“Barselona”nın braziliyalı hücumçusu Rafinya İspaniya La Liqasının 2026/27 mövsümündə avqust ayının ən yaxşı futbolçusu seçilib.
Arena.az xəbər verir ki, braziliyalı vinger ötən ay çempionatda keçirdiyi 3 oyunda 5 qol vurub və 1 məhsuldar ötürmə edib.
Rafinya mövsümün ilk turunda “Elçe”ni 5:0 hesabı ilə məğlub etdikləri matçda 2 qol və 1 məhsuldar ötürmə ilə yadda qalıb. O, “Atletik”lə 2:0 hesablı görüşdə 1 dəfə fərqlənib, “Rayo Valyekano”nu 5:2 hesabı ilə məğlub etdikləri qarşılaşmada isə daha 2 qol vurub.
29 yaşlı futbolçu sentyabr ayında da məhsuldarlığını davam etdirib. Rafinya “Valensiya”ya qarşı 6:0 hesablı qələbədə daha 1 qol vurub. Beləliklə, braziliyalı hücumçunun mövsümün əvvəlindən ümumi göstəricisi 6 qol və 1 məhsuldar ötürməyə çatıb.
Qeyd edək ki, Rafinya bu mükafat uğrunda səsvermədə “Real”dan Cud Bellingemi, “Atletiko”dan Aleks Baenanı, “Deportivo”dan Pyer-Emerik Obameyanqı və “Alaves”dən Nahuel Tenalyanı qabaqlayıb.
Braziliyalı futbolçu cari mövsümün əvvəlində “Barselona”nın ilk kapitanı seçilib. Kataloniya klubu La Liqada keçirdiyi ilk 4 oyunun hamısında qələbə qazanıb.
