Bu gün keçirilmiş oyunlarla Azərbaycan Basketbol Liqasında (ABL) 2026/2027-ci illər mövsümünün 7-ci turuna yekun vurulub.
Arena.az xəbər verir ki, turun sonuncu oyun günündə iki qarşılaşma keçirilib.
Bakıda NTD ilə “Naxçıvan” üz-üzə gəlib. Görüş qonaq komandanın böyükhesablı qələbəsi ilə yekunlaşıb.
“Naxçıvan”ın heyətində Oleq Kojenets 23 xal və 13 ribaundla “double-double” edib.
NTD – “Naxçıvan” – 56:84 (14:23, 14:29, 15:21, 13:11)
Sumqayıtda isə yerli komanda “Ordu”nu qəbul edib. “Sumqayıt” rəqibini 123:88 hesabı ilə məğlub edib.
Qalib komandanın heyətində Malik Qrin 27 xalla ən məhsuldar basketbolçu olub.
“Sumqayıt” – “Ordu” – 123:88 (36:23, 31:16, 31:22, 25:27)
Qeyd edək ki, turun əvvəlki oyunlarında “Sabah” “Neftçi”ni 93:78, “Landau Lions” isə “Gəncə”ni 85:62 hesabı ilə məğlub etmişdi.
Beləliklə, 7 turdan sonra ABL-in yarış cədvəlindəki vəziyyət belədir:
- “Sabah” – 11 xal
- “Naxçıvan” – 11
- “Neftçi” – 11
- “Sumqayıt” – 10
- “Landau Lions” – 9
- “Gəncə” – 8
- “Ordu” – 8
- NTD – 7.


