İngiltərənin “Nottingem Forest” klubu baş məşqçi Stiv Kuper ilə müqaviləni yeniləyib. Arena.az xəbər verir ki, bu barədə Premyer Liqa klubunun rəsmi saytı məlumat yayıb.
42 yaşlı mütəxəssislə müqavilə 2025-cin yayına kimi nəzərdə tutulub. Halbuki, Uelsdən olan məşqçinin istefası gündəmdə idi. Məsələ burasındadır ki, onun rəhbərliyi altında komanda bu mövsüm heç də uğurlu çıxış etmir.
Stiv Kuper 2021-ci ilin sentyabr ayından “qırmızı-qaralar”ın “sükanı arxasında” çalışır. O vaxtdan bəri bu komandanı 54 matça çıxarmış mütəxəssis, 29 qələbəyə sevinib. Qalan oyunlardan 11-i heç-heçə, 14-ü isə məğlubiyyətlə bitib.
“Nottingem Forest” məhz Kuperin rəhbərliyi altında 1998-ci ildən bəri ilk dəfə İngiltərə Premyer Liqasında iştirak hüququ qazanıb. Sözügedən komanda bu mövsüm Premyer Liqada 8 turdan sonra cəmi 4 xal toplaya bilib və turnir cədvəlinin 20-ci pilləsində qərarlaşıb. Elitaya çıxdıqdan sonra transferlərə də 100 milyon avrodan çox vəsait xərcləmiş “Nottingem Forest”in Kuperlə autsayderlər qrupundan xilas olub-olmayacağı maraq doğurur.
