Bu gün basketbol üzrə Azərbaycan kubokunda 2022/23 mövsümünün qrup mərhələsinin 2-ci turunun oyunları keçirilib. Arena.az xəbər verir ki, oyunların hamısı “Sərhədçi” İdman Mərkəzində baş tutub.
A qrupunda “Sabah” “Sərhədçi” ilə münasibətlərinə aydınlıq gətirib. Gərgin keçən oyunun sonunda “Sabah” 97:92 hesablı qələbəyə sevinib. Qalib komandanın heyətində ən məhsuldar basketbolçu Fuad Niftəliyev olub – 26 xal, 7 asist. “Sərhədçi”də isə Maykl Diqqins fərqlənib – 25 xal, 13 ribaund.
Qrupun digər oyununda “Gəncə” “AAAF Xırdalan”la münasibətlərinə aydınlıq gətirib. Gəncə təmsilçisi ilk turda olduğu kimi, bu dəfə də meydanı qələbə ilə tərk edib – 91:65. “Gəncə”nin heyətində Kollin Törner 27 xal, 7 ribaundla ən məhsuldar basketbolçu olub. “AAAF Xırdalan”da isə Deymon Makdouel ön plana çıxıb – 30 xal, 6 ribaund.
B qrupunda NTD ilə “Neftçi” İK arasında görüş gərginliyi ilə yadda qalıb. Yekunda NTD basketbolçuları 108:89 hesablı qələbəyə seviniblər. Qalib komandanın heyətində ən məhsuldar basketbolçu Kinton Kempbel olub – 15 xal, 3 ribaund. “Neftçi”də isə Yuri Kondrakov 21 xal, 5 asistlə özündən söz etdirib.
Bu qrupun digər oyunu “Olimpik Şəki” ilə “Zirvə Astara” arasında olub. Astara təmsilçisi yekunda 94:69 hesabıyla qalib gəlib. Bu komandanın heyətində ən məhsuldar basketbolçu Ruşard Kruikşenk olub – 32 xal, 5 ribaund. “Olimpik Şəki”də isə Larri Robinson ön planda olub – 25 xal, 7 ribaund.
Qrup mərhələsində iki turdan sonra vəziyyət belədir:
A qrupu
- Gəncə (2-0) 4 xal
- AAAF Xırdalan (1-1) 3 xal
- Sabah (1-1) 3 xal
- Sərhədçi (0-2) 2 xal
B qrupu
- NTD (2-0) 4 xal
- Neftçi (1-1) 3 xal
- Zirvə Astara (1-1) 3 xal
- Olimpik Şəki (0-2) 2 xal
İki turdan sonra qrup lideri olan “Gəncə” və NTD basketbolçuları kubokun yarımfinalına vəsiqəni təmin ediblər. Basketbol üzrə Azərbaycan kubokunda qrup mərhələsinə sabah keçiriləcək son turun oyunları ilə yekun vurulacaq.
