İspaniyanın Santyaqo de Kompostela şəhərində 20 yaşadək güləşçilər arasında keçirilən U-20 Avropa çempionatı davam edir.
Arena.az xəbər verir ki, beşinci yarış günündə 57, 65, 70, 79 və 97 kq-da yer alan sərbəst güləşçilər mübarizəyə qoşulmuşdular.
Bu gün isə bu çəki dərəcələri üzrə qaliblər müəyyənləşib.
Ruslan Abdullayev (57 kq) bolqarıstanlı Tanyo Tanev (11:0), gürcüstanlı Luka Qvinjiliya (13:2) və türkiyəli Tolqa Özbekə (6:5) qalib gələrək finala yüksəlmişdi. Abdullayev bu gün həlledici görüşdə moldovalı Anton Vlasla güləşib. Rəqibinə heç bir şans tanımayan Ruslan 10:0 hesablı qələbəylə Avropa çempionu olub.
Cavidan Əhmədov (70 kq) ermənistanlı Davit Marqaryanla (13:7) polşalı Zəlimxan Mutsuxayevi (10:0) yolundan kənarlaşdırsa da, yarımfinalda türkiyəli İbrahim Yaprakla gərgin mübarizə şəraitində keçən görüşdə sonuncu xal prinsipinə əsasən məğlub olmuşdu – 8:8. Əhmədov bu gün bürünc medal uğrunda avstriyalı Muhamed Bektemirovla güləşib. Gərgin mübarizə şəraitində keçən görüşdə 10:9 hesablı qələbə qazanan Cavidan bürünc medala sahib çıxıb.
Sadiq Mustafazadə (79 kq) yunanıstanlı Georgios Terzidislə (9:1) polşalı Mateuş Pedziçkini (8:5) məyus edə bilsə də, 1/4 finalda gürcüstanlı Otari Adeişvili keçilməz olmuşdu – 2:6. Mustafazadə təsəlliverici görüşdə bu gün litvalı Paulius Leskauskası yarışdan kənarlaşdırıb – 10:0. Sadiq bürünc medal uğrunda qarşılaşmada türkiyəli Bekir Öveçi də eyni hesabla üstələyərək fəxri kürsünün 3-cü pilləsinə yüksəlib.
Zəfər Əliyev (97 kq) ispaniyalı Enrike Ximenesə tam üstünlüklə (13:0) qalib gəlsə də, 1/4 finalda ukraynalı İvan Primaçenkoya 0:2 hesabıyla məğlub olmuşdu. Əliyev bu gün təsəlliverici görüşdə fransalı Əsgərxan Xunkayev üzərində böyükhesablı qələbə qazanıb – 10:2. O, üçüncü yer uğrunda görüşdə də slovakiyalı Adam Jaksiklə qarşılaşıb. Rəqibinə 12:5 hesabı ilə qalib gələn Əliyev qitə üçüncüsü olub.
Xatırladaq ki, U-20 Avropa çempionatı sabah başa çatacaq.
