Fransisko Rodriqes İspaniya La Liqasında mübarizə aparan “Rayo Valyekano” komandasının yeni baş məşqçisi təyin olunub.
Arena.az xəbər verir ki, bu barədə sözügedən klub rəsmi saytı vasitəsilə məlumat yayıb.
45 yaşlı ispan mütəxəssislə 1 illik (2024-cü ilin 30 iyununa qədər) müqavilə imzalanıb. O, daha öncə “Jirona”, “Elçe”, “Hueska”, “Kordoba”, “Luqo”, “Mursiya” və “Almeriya” kimi klublarda da baş məşqçi kimi çalışıb.
Fransisko Rodriqes “Rayo Valyekano”nun baş məşqçi postunda Andoni İraolanı əvəz edib. Hansı ki, o, bu yay sözügedən klubdan ayrılaraq İngiltərə Premyer Liqasında mübarizə aparan “Bornmut”un “sükanı arxası”na keçmişdi.
“Rayo Valyekano” heyətinə yeni futbolçu da cəlb edib. Sözügedən klub La Liqanın digər təmsilçisi “Osasuna”dan ayrılan Aridane Hernandeslə 2 illik müqavilə imzalandığını açıqlayıb. 34 yaşlı futbolçu yeni klubuna azad agent kimi qoşulub. 2017-ci ildən oynadığı “Osasuna”da 152 oyuna çıxmış mərkəz müdafiəçisi 4 qol və 3 məhsuldar ötürmə ilə yadda qalıb. O, daha öncə “Kadis”, “Eldense”, “Seuta”, “Alaves” kimi klublarda da forma geyinib.
“Rayo Valyekano” üç futbolçusu – qapıçı Dieqo Lopes, mərkəz müdafiəçisi Esteban Savelyiç və sağ cinah müdafiəçisi Mario Hernandeslə də yollarını ayırıb.
41 yaşlı Dieqo Lopes ötən mövsümün əvvəlində cəlb olunduğu “Rayo Valyekano”da cəmi 5 oyun keçirib. Təcrübəli ispan qolkiper əvvəllər “Vilyarreal”, “Espanyol”, “Real”, “Milan”, “Sevilya” kimi klublarda, İspaniya yığmasında da oynayıb.
Esteban Savelyiç 2019-cu ildən “Rayo Valyekano”da idi. Argentina və Monteneqro vətəndaşlığı olan 32 yaşlı futbolçu La Liqa təmsilçisində 91 oyuna çıxıb, 4 qol da vurub. O, “Almeriya”, “Albasete”, “Rasinq”, “Defensa Xustisiya və “Levante” kimi klublarda da çıxış edib.
Mario Hernandes isə 2019-cu ilin yanvarından “Rayo Valyekano”da forma geyinirdi. 24 yaşlı ispan bu komandada 37 oyuna çıxıb, 1 qolla yadda qalıb. O, “Rekreativo”, “Melilya”, “Reyes” kimi klubların da formasını geyinib.
