Futbol üzrə Azərbaycan millisinin sabiq hücumçusu Rüfət Dadaşov Almaniyanın “Dinamo” (Berlin) komandasında növbəti matçına çıxıb.
Arena.az xəbər verir ki, futbolçumuzun komandası bu gün Almaniyanın Şimal-Şərq Regional Liqasının 2-ci turu çərçivəsində “Altqlinikke” ilə qarşılaşıb.
“Dinamo” bu rəqiblə səfərdə qarşılaşıb. Dörd qolun qeydə alındığı matç futbolçumuzun komandasının məğlubiyyəti ilə başa çatıb – 1:3. Bunda Berlin təmsilçisinin iki futbolçusunun elə ilk hissədəcə (26 və 37-ci dəqiqələrdə) meydandan qovulması da böyük rol oynayıb.
Rüfət bu oyuna start heyətdə başlayıb və 69-cu dəqiqədə əvəzlənib. Oyunda hesabı da 37-ci dəqiqədə Dadaşov açıb. Amma komandası ikinci hissədə buraxdığı qollarla meydanı məğlub tərk edib.
Xatırladaq ki, bu, Rüfət Dadaşovun cari mövsümdəki ikinci qoludur. O, ilk turda da fərqlənmişdi.
İki turdan sonra 3 xala malik Berlin “Dinamo”su 18 iştirakçı arasında 7-ci pillədə qərarlaşıb.
Rüfət Dadaşov “Dinamo”ya bu yay “Şalke”dən azad agent kimi ayrılaraq keçib. Azərbaycanlı hücumçu 2017/2018 mövsümündə məhz “Dinamo”nun uğurları üçün çalışıb. O, həmin vaxt Berlin təmsilçisində 29 oyuna 29 qol vurub, 2 məhsuldar ötürmə müəllifi olub. Rüfət Azərbaycan milli komandasında da 24 oyuna çıxıb, 5 qola imza atıb.
